Ostonada 29-may kuni O‘zbekiston Prezidenti Shavkat Mirziyoyev va Qozog‘iston Prezidenti Qasim-Jomart Toqayev ishtirokida ikki davlat o‘rtasida savdo-iqtisodiy hamkorlik bo‘yicha yo‘l xaritasini imzolash marosimi bo‘lib o‘tdi.
Ikki davlat matbuot xizmatlari xabarlariga ko‘ra, hujjat savdo va investitsiya sohasida avval erishilgan kelishuvlarni amalga oshirish bo‘yicha amaliy qadamlarni belgilaydi. O‘zbekiston Prezident matbuot xizmati hujjatni investitsiya va savdo sohasida erishilgan kelishuvlarni amalga oshirish bo‘yicha amaliy harakatlar rejasi deb atagan.
Qozog‘iston tomonining qayd etishicha, yo‘l xaritasining imzolanishi Qasim-Jomart Toqayevning 2025-yil 14–15-noyabr kunlari O‘zbekistonga davlat tashrifi chog‘ida erishilgan kelishuvlarning davomi hisoblanadi. O‘zbekiston tomoni esa hujjat Buxoro va Turkiston shaharlarida 2026-yil aprel–may oylarida davlat rahbarlari o‘rtasidagi uchrashuvlar yakunlari bo‘yicha erishilgan kelishuvlarni amalga oshirishga qaratilganini ta’kidladi.
Matbuot xizmatlari ma’lumotiga ko‘ra, yo‘l xaritasi hamkorlikning keng yo‘nalishlarini qamrab oladi. Qozog‘iston tomoni sanoat, neft-kimyo, logistika, metallurgiya, agrosanoat kompleksi, turizm va “yashil” energetikani qayd etgan. O‘zbekiston Prezident matbuot xizmati xabarida esa avtomobilsozlik, energetika, kimyo sanoati, farmatsevtika, qurilish materiallari ishlab chiqarish, uy-joy qurilishi va qishloq xo‘jaligi ham tilga olingan.
Hujjatning boshqa tafsilotlari matbuot xizmatlari tomonidan oshkor etilmagan.
Shuningdek o‘qing: