Prezident Shavkat Mirziyoyevning farmoni bilan O‘zbekiston Prezident Administratsiyasi rahbarining lavozimi qayta joriy etildi. Ushbu lavozimga Prezidentning to‘ng‘ich qizi — Saida Shavkatovna Mirziyoyeva tayinlandi.
Bu tayinlovni davlat rahbarining matbuot kotibi Sherzod Asadov rasman tasdiqladi. Saida Mirziyoyeva 40 yoshda bo‘lib, 2023-yil avgustidan buyon Prezident yordamchisi sifatida ishlagan. Bungacha, 2022-yil noyabridan boshlab u Prezident Administratsiyasi ijro apparatining axborot siyosati va kommunikatsiyalar bo‘limiga rahbarlik qilgan.
U boshqargan bo‘lim Komil Allamjonovga bo‘ysungan bo‘lib, u o‘z vaqtida axborot siyosati va jamoatchilik fikrini o‘rganish bo‘yicha Administratsiya rahbarining o‘rinbosari bo‘lgan.
Saida Mirziyoyeva Jahon iqtisodiyoti va diplomatiya universitetini tamomlagan, Toshkent davlat yuridik universiteti hamda Moskva davlat universitetida magistrlik darajasini olgan. Iqtisod fanlari nomzodi hisoblanadi.
2019–2020 yillarda u Prezident Administratsiyasi huzuridagi Axborot va ommaviy kommunikatsiyalar agentligi direktori o‘rinbosari, keyinchalik esa Milliy ommaviy axborot vositalarini qo‘llab-quvvatlash jamg‘armasi Vasiylik kengashi raisining o‘rinbosari bo‘lgan.
2023-yil avgustida Prezident Administratsiyasining avvalgi rahbariy lavozimi tugatilgan edi. 2022–2023 yillarda bu lavozimni Sardor Umurzoqov egallagan bo‘lib, hozir u Prezidentning alohida topshiriqlar bo‘yicha maslahatchisi hisoblanadi.