Toshkentda «Demokrat.uz» rahbari Fazlidinxon Mehmonov va bloger Aziz G‘oipnazarovga nisbatan jinoyat ishi qo‘zg‘atildi. Tergov ma’lumotlariga ko‘ra, ular Sergelidagi avtosalon egasidan obro‘sizlantiruvchi videoni o‘chirish evaziga 50 ming AQSh dollari talab qilgan. Mehmonov pulning bir qismini olayotganida qo‘lga olingan. «Demokrat.uz» sayti (nashr ma’lumotiga ko‘ra) 2022 yilda OAV sifatida ro‘yxatdan o‘tgan va YouTube hamda Instagram’da katta auditoriyaga ega. Bu ish 2026 yil yanvar–fevral oylarida O‘zbekistonda jurnalist va blogerlarga qarshi qo‘zg‘atilgan jinoyat ishlarining bir qismiga aylandi.
Toshkent shahar IIBB huzuridagi Tergov boshqarmasi «Demokrat.uz» rahbari Fazlidinxon Mehmonov va bloger Aziz G‘oipnazarovga nisbatan jinoyat ishini ochdi. Ish O‘zbekiston Respublikasi Jinoyat kodeksining 165-moddasi 3-qismi «a» bandi — «juda koʻp miqdorda tovlamachilik» bo‘yicha qo‘zg‘atilgan.
Tergovga ko‘ra, 2025 yil 15 dekabr kuni G‘oipnazarov Sergelidagi avtosalon faoliyatini obro‘sizlantiruvchi videoni internetga joylagan. Shundan so‘ng Mehmonov bilan birga salon egasidan 50 ming dollar talab qilgan. Ular videoni ijtimoiy tarmoqlardan o‘chirish va boshqa videoni joylamaslikni va’da qilgan.
29 yanvar kuni Mehmonov jabrlanuvchidan 3 ming dollar olgan. 10 fevralda esa 17 ming dollar olayotganida dalillar bilan qo‘lga olingan.
Huquqni muhofaza qiluvchi organlar fuqarolarga murojaat qilib, agar kimdir ushbu shaxslarning harakatlaridan jabr ko‘rgan bo‘lsa, eng yaqin ichki ishlar organiga yoki 102 raqamiga murojaat qilishni so‘radi.
«Demokrat.uz» saytida berilgan ma’lumotga ko‘ra, veb-sayt 2022 yil 1 oktyabrda O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligida OAV sifatida ro‘yxatdan o‘tgan. Saytdagi so‘nggi maqola 31 yanvarda e’lon qilingan. O‘sha kuni 8295 obunachiga ega Telegram-kanalda ham so‘nggi post paydo bo‘lgan.
YouTube’dagi «Demokrat.uz» kanali 608 ming obunachiga, Instagram’dagi kanali esa 350 ming obunachiga ega. Facebook’dagi sahifa hozircha faol emas.
Bu oxirgi paytlarda jurnalist va blogerlarga qarshi qo‘zg‘atilgan jinoyat ishlaridan biri.
Yanvar oxirida Urganchda «Qonun doirasida» loyihasi rahbari Furqat Ro’zmetov va tahririyat xodimi Azamat Avezov hibsga olingan. Ular tuhmat, tovlamachilik va boshqa jinoyatlarda gumon qilinmoqda. Ikkalasi ham yurist.
2026 yil 16 yanvarda Toshkentda «Taftish.uz» OAV bilan bog‘liq besh kishi hibsga olingan. Ular Jinoyat kodeksining 165-moddasi (tovlamachilik) va 168-moddasi (firibgarlik) bo‘yicha gumon qilinmoqda.
Shuningdek, 20 yanvar kuni Marg‘ilon shahar jinoyat ishlari bo‘yicha sud jurnalist Elyor Tojiboyevni Jinoyat kodeksining bir qator moddalarida aybdor deb topib, uni to‘rt yilga qattiq tartibli koloniyada jazoni o‘tashga hukm qilgan.