2026-yil 1-yanvardan boshlab AQSh fuqarolari Oʻzbekistonga 30 kungacha vizasiz kirish huquqiga ega boʻladi. Bu haqdagi tegishli farmonga prezident Shavkat Mirziyoyev 3-noyabr kuni imzo chekdi, deb xabar berdi UzA.
Hujjatda ta’kidlanishicha, mazkur qaror ikki mamlakat o‘rtasidagi savdo-iqtisodiy, madaniy va gumanitar aloqalarni yanada rivojlantirish, shuningdek, turizm almashinuvini kengaytirish uchun qulay sharoitlar yaratishga qaratilgan.
2021-yildan beri Oʻzbekistonda 55 yoshdan oshgan va turistik maqsadlarda 30 kungacha boʻlgan muddatga kiruvchi AQSh fuqarolari uchun vizasiz tartib amal qilib kelmoqda.
Barcha AQSh fuqarolari uchun vizasiz tartibni joriy etish rejasi avvalroq 15-maydagi prezident farmonida tilga olingan edi. O‘sha hujjatda Tashqi ishlar vazirligiga Oʻzbekiston fuqarolari uchun AQShga kirish vizasini soddalashtirish masalasida muzokaralarni boshlash topshirilgan edi.