2025-yil 21-iyuldagi Prezidentning 506-sonli farmoniga binoan, Ukraina Prezidenti Volodimir Zelenskiy Mikola Doroshenkoni Ukrainaning O‘zbekiston Respublikasidagi Favqulodda va Muxtor Elchisi lavozimidan ozod etdi.
«DOROSHENKO Mikola Petrovichni Ukrainaning O‘zbekiston Respublikasidagi Favqulodda va Muxtor Elchisi lavozimidan ozod etilsin», — deyiladi davlat rahbarining rasmiy saytida e’lon qilingan hujjatda.
Mikola Doroshenko bu lavozimda 2020-yildan buyon faoliyat yuritgan.
2022-yil mart oyida, Rossiyaning Ukrainaga qarshi keng ko‘lamli tajovuzi boshlanganidan ko‘p o‘tmay, Doroshenko Yep.uz saytiga rus tilida intervyu bergan edi. Unda elchi quyidagilarni ta’kidlagan:
«Ukrainada hozir nima bo‘lyapti? Bu — ukrain fuqarolarini yo‘q qilishga qaratilgan urush, Ukrainaga hech kim kutmagan rus dunyosini olib kelishga qaratilgan urushdir.»
Mazkur intervyu urushning ilk kunlarida Ukraina tomonidan O‘zbekiston jamoatchiligiga qaratilgan muhim diplomatik bayonot bo‘ldi.