27-iyun kuni O‘zbekiston Prezidenti Shavkat Mirziyoyev Belarus poytaxti Minskda bo‘lib o‘tayotgan Yevroosiyo iqtisodiy ittifoqi (YeOII) sammiti doirasida Rossiya Prezidenti Vladimir Putin bilan uchrashuv o‘tkazdi. O‘zbekiston bu tashkilotda kuzatuvchi maqomida ishtirok etadi.
O‘zbekiston Prezidentining matbuot xizmati bergan rasmiy ma’lumotga ko‘ra, uchrashuvda ikki tomonlama hamkorlikning bugungi holati va ehtimoliy yo‘nalishlari muhokama qilingan. Oldin erishilgan kelishuvlarni amalga oshirishga urg‘u berilgan.
Tomonlar o‘zaro savdo hajmi o‘sishini, qo‘shma loyihalarning davom etishini, shuningdek, hududlararo aloqalar va madaniy-gumanitar almashinuvni qayd etganliklari aytilmoqda.
Uchrashuv tafsilotlari va konteksti ochiqlanmagan. Rossiyaning Ukrainaga nisbatan davom etayotgan tajovuzi fonida bunday muloqotlar, ayniqsa, O‘zbekistonning tashqi siyosiy ustuvor yo‘nalishlari borasida mutaxassislar orasida savollar uyg‘otishi mumkin.