Mustaqil O‘zbekiston tarixidagi ilk aholi va qishloq xo‘jaligi ro‘yxatga olishining dastlabki natijalari mamlakat aholisi soni 39 047 321 kishiga yetganini ko‘rsatdi.
Bu amaldagi statistik bahodan 810 617 kishiga ko‘pdir. Amaldagi hisob-kitoblarga ko‘ra, mamlakat aholisi 38 236 704 kishini tashkil etgan.
Ro‘yxatga olish 2026-yil 15-yanvardan 28-fevralgacha o‘tkazildi. Ro‘yxatdan keyingi tekshiruv natijalariga ko‘ra, umumiy aholining 97,3 foizi qamrab olingan. Shundan 82,3 foizi onlayn ro‘yxatdan o‘tgan. Qolgan aholini hisobga olish uchun planshetlardan foydalangan holda uyma-uy yurib chiqish tashkil etilgan.
Dastlabki ma’lumotlarga ko‘ra, 1989-yildagi ro‘yxatga olish natijalari bilan solishtirganda O‘zbekiston aholisi ikki baravar oshgan. Mamlakatda erkaklar soni 19 766 166 nafarni, ayollar soni esa 19 281 155 nafarni tashkil etgan. Ro‘yxatga olish jarayonida O‘zbekiston hududida bir yildan ortiq yashayotgan 56,9 ming nafar chet el fuqarosi ham hisobga olingan. Ularning asosiy qismini Hindiston, Rossiya va Qozog‘iston fuqarolari tashkil etadi.
Ro‘yxatga olishning dastlabki natijalariga ko‘ra, aholining 89,4 foizini o‘zbeklar, 3,3 foizini tojiklar, 2,2 foizini qoraqalpoqlar, 1,8 foizini qozoqlar, 1,6 foizini ruslar, 0,6 foizini qirg‘izlar, 0,5 foizini turkmanlar tashkil etgan. Boshqa millatlar vakillari ulushi 0,6 foiz bo‘lgan.
Shuningdek, 35,7 million kishi yoki aholining 91,3 foizi o‘zbek tilini ona tili sifatida ko‘rsatgan. Bu ko‘rsatkich etnik o‘zbeklar ulushidan 1,9 foiz punktga yuqori.
Qishloq xo‘jaligi ro‘yxatga olishining dastlabki natijalari ham amaldagi statistik hisob-kitoblardan sezilarli farqlarni aniqladi. Bir yillik ekin maydonlari 23 foizga, bog‘ va uzumzorlar 18,8 foizga, issiqxonalar 2,2 foizga, baliqchilik suv havzalari esa 15 foizga ko‘p bo‘lib chiqqan.
Chorvachilikda ham o‘zgarishlar qayd etilgan. Amaldagi hisob-kitoblar bilan solishtirganda qoramollar soni 14,9 foizga, qo‘y va echkilar soni 6,2 foizga, otlar soni 11,2 foizga kam bo‘lib chiqqan. Shu bilan birga, parrandalar soni 12,7 foizga yuqori bo‘lgan.
Ro‘yxatga olishning dastlabki ma’lumotlari Milliy statistika qo‘mitasi tomonidan muntazam e’lon qilib boriladi.
Shuningdek o‘qing: