Toshkent shahri Yakkasaroy tumanidagi jinoyat ishlari bo‘yicha sud rossiyalik jurnalist Inessa Papernaya, uning hamrohi Maksim Radchenko hamda O‘zbekiston fuqarosi Xushnud Udekovning Karaman Palace mehmonxonasida uglerod oksididan zaharlanib vafot etishi yuzasidan to‘rt kishini aybdor deb topdi. Hukm 25 iyul kuni Yakkasaroy tuman sudyasi Bahodir Qayumov tomonidan o‘qildi.
Sud jarayoni 26 may kuni boshlangan. Tergov materiallariga ko‘ra, fojia 2024 yil 22 oktyabrda sodir bo‘lgan. Papernaya va Radchenko mehmonxona xonasida, yana bir O‘zbekiston fuqarosi esa boshqa xonada vafot etgan holda topilgan. O‘zbekiston Bosh prokuraturasining ma’lumotiga ko‘ra, sud-kimyoviy ekspertiza Papernayaning qonida karboksigemoglobin — gemoglobin va uglerod oksidi birikmasini aniqlagan.
Tergov aprel oxirida yakunlanib, ish sudga oshirilgan. Ayblanuvchilarga xavfsizlik talablariga javob bermaydigan ish yoki xizmat ko‘rsatish, shuningdek o‘zboshimchalikda harakat qilish moddalari bo‘yicha 12 yilgacha ozodlikdan mahrum etish jazosi tahdid qilgan.
Sud Karaman Palace mehmonxonasi egasi Azamat Xudjakulovni Jinoyat kodeksining 186-moddasi 4-qism «a» bandi bo‘yicha aybdor deb topdi va uni 8 yil 1 oy muddatga ozodlikdan mahrum etdi. Qolgan uch nafar ayblanuvchi — santexnik Nodirbek Qurbonov hamda isitish jihozlari sotuvchilari Zayniddin Jamoldinov va Abdurasul Yusupov — har biri 3 yilga qamaldi. Ilgari prokuratura ular uchun 7–8 yillik jazo talab qilgan edi.
Sud qaroriga ko‘ra, hukm qilinganlar Radchenkoning qarindoshlariga 60,68 mln so‘m (taxminan 380 ming rubl), Papernayaning oilasiga esa 67,58 mln so‘m (taxminan 420 ming rubl) miqdorida kompensatsiya to‘lashlari lozim — ekspertiza va jasadlarni vatanga qaytarish xarajatlari uchun.
Hukm qilinganlar umumiy tartibdagi koloniyada jazo o‘tashadi. Ular sud qarorini 10 kun ichida apellyatsiya qilish huquqiga ega.
Tergov ma’lumotlariga ko‘ra, zaharlanishga sabab bo‘lgan isitish qozoni yaroqsiz holatda bo‘lgan: u sertifikatsiyadan o‘tmagan, texnik ko‘rikdan o‘tmagan va 2021 yilda hisobdan chiqarilishi kerak edi. Sudda Xujakulov aybini qisman tan oldi, qolgan uch kishi esa o‘z aybini rad etdi.