Shavkat Mirziyoyev va Vladimir Putin 8-may kuni Ikkinchi jahon urushidagi G‘alabaning 81 yilligiga bag‘ishlangan tadbirlar oldidan Kreml’da muzokaralar o‘tkazdi. Ikki davlat matbuot xizmatlari xabarlariga qaraganda, Moskva ittifoqchilik munosabatlarining siyosiy namoyishi va Toshkentning shaxsiy qo‘llab-quvvatlashiga urg‘u bergan bo‘lsa, O‘zbekiston tomoni uchrashuvni asosan iqtisodiyot, kooperatsiya va gumanitar aloqalarga oid ishchi muzokaralar sifatida taqdim etdi.
Kreml xabarida Putinning Mirziyoyevning Moskvaga tashrifini ikki davlat o‘rtasidagi munosabatlarning “alohida belgisi” deb atagan so‘zlari markaziy o‘rin egalladi. Rossiya prezidenti o‘zbek yetakchisining paraddagi ishtirokini Rossiya bilan aloqalarni saqlab qolayotgan davlatlarga nisbatan tashqi bosim bilan bevosita bog‘ladi.
“Shuni alohida belgi deb bilamizki, O‘zbekiston Prezidenti tashqi signallar va tahdidlarga qaramay bu yerga keldi va ertaga biz hamda hamkasblarim bilan birga Qizil maydondagi harbiy paradda ishtirok etadi”, — dedi Putin.
Rossiya yetakchisi Moskva va Toshkent o‘rtasidagi munosabatlarni “shunchaki do‘stlik emas”, balki “birodarlik hamkorligi” deb ham ta’rifladi. Kreml xabarida savdo hajmi, investitsion hamkorlik va Rossiyaning O‘zbekiston iqtisodiyotidagi ishtiroki oshib borayotgani ta’kidlangan.
Mirziyoyev esa javoban G‘alabani “umumiy tarix” va “umumiy G‘alaba” deb atab, yosh avlod uchun urush xotirasini saqlash zarurligini urg‘uladi.
“Men bu yerga nevaralarimga, farzandlarimga, yosh avlodga ularning bobolari qahramon bo‘lganini aytish uchun keldim. Bu eng muhimi, biz buni unutmasligimiz kerak”, — dedi O‘zbekiston prezidenti.
U, shuningdek, ikki davlat o‘rtasidagi товарооборот oshgani haqida gapirib, birinchi chorak yakunlariga ko‘ra ko‘rsatkich o‘tgan yilga nisbatan 33 foizga ko‘payganini билдирди. Mirziyoyev alohida ravishda “Innoprom” ko‘rgazmasi o‘tkazilgani hamda Rossiya gubernatorlari va kompaniyalarining O‘zbekistonga tashriflarini tilga oldi.
Shu bilan birga, O‘zbekiston prezidenti matbuot xizmatining rasmiy bayonoti ancha ehtiyotkor ohangda bo‘lib, Kreml e’lonida mavjud siyosiy urg‘ulardan deyarli butunlay qochdi.
O‘zbekiston xabarida uchrashuv “O‘zbekiston-Rossiya keng qamrovli strategik sheriklik va ittifoqchilik munosabatlarini yanada kengaytirish va mustahkamlash” muhokamasi sifatida tasvirlangan. Asosiy e’tibor savdo, sanoat, energetika, metallurgiya va hududlararo hamkorlikka qaratilgan.
Mirziyoyev matbuot xizmati, shuningdek, “savdo aylanmasi dinamikasini сақлаб qolish” va ustuvor tarmoqlardagi kooperatsiya loyihalarini jadallashtirish zarurligini alohida qayd etdi. Bundan tashqari, madaniy-gumanitar almashinuvlar hamda xalqaro kun tartibi masalalari muhokama qilingani aytilgan, biroq tafsilotlar keltirilmagan.
Kreml xabaridan farqli ravishda, O‘zbekiston tomoni “tashqi tahdidlar” haqidagi bayonotlarni keltirmadi, “birodarlik hamkorligi” kabi iboralardan foydalanmadi va Mirziyoyevning harbiy paraddagi ishtirokini siyosiy signal sifatida ko‘rsatmagan.
Bayonotlardagi farqlar ikki poytaxtning ikki tomonlama aloqalarni ommaviy yoritishdagi an’anaviy yondashuvini aks ettiradi. Kreml so‘nggi yillarda xorijiy yetakchilarning 9-may tadbirlariga tashriflarini Rossiyaning xalqaro izolyatsiyada emasligini ko‘rsatish sifatida muntazam ishlatib kelmoqda. Toshkent esa odatda iqtisodiy hamkorlikka urg‘u berishga va Moskva bilan munosabatlarni oshkora siyosiylashtirishdan qochishga harakat qiladi.
Mavzuga oid boshqa maqolalar: