O‘zbekiston Prezidenti Shavkat Mirziyoyev kelasi haftada Vashingtonga rasmiy tashrif buyuradi, deb xabar berdi AQShning Toshkentdagi elchixonasi dushanba kuni kechqurun.
«Kelasi haftada Vashingtonga amalga oshiriladigan tashrifi arafasida O‘zbekiston Prezidenti Shavkat Mirziyoyev bilan juda samarali uchrashuv bo‘lib o‘tdi. O‘zbekiston AQSh iqtisodiyotiga investitsiya kiritish va savdo-iqtisodiy aloqalarni kengaytirishga katta qiziqish bildirmoqda. Ikki tomonlama hamkorligimiz mustahkam va tobora rivojlanib bormoqda», — bayonotda qayd etilgan.
O‘zbekiston Prezidenti Janubiy va Markaziy Osiyo bo‘yicha AQSh maxsus vakili Serjio Gor hamda Davlat kotibi o‘rinbosari Kristofer Landau bilan uchrashdi. Ular Qozog‘iston va O‘zbekistonga qilinayotgan mintaqaviy safar doirasida Toshkentga keldi.
AQSh Davlat departamentining ma’lum qilishicha, tashrif 2025-yil 26–30-oktabr kunlari davom etadi. Safarning maqsadi — iqtisodiy va xavfsizlik masalalarini muhokama qilish, shuningdek AQSh hamda Markaziy Osiyo mamlakatlari o‘rtasidagi “C5+1” formatidagi hamkorlikni rivojlantirishdir.
Tomonlar savdo, investitsiya, muhim foydali qazilmalar va energetika sohalarida hamkorlikni kengaytirish masalalariga alohida e’tibor qaratdi. Tashrif davomida AQSh delegatsiyasi Amerika kompaniyalari vakillari bilan uchrashuvlar o‘tkazib, qo‘shma iqtisodiy o‘sishni kuchaytirish imkoniyatlarini muhokama qildi.
O‘zbekistondagi tashrif davomida delegatsiyaga tashqi ishlar vaziri Baxtiyor Saidov hamrohlik qilmoqda. Serjio Gor va Kristofer Landau Samarqandga tashrif buyurib, shaharning tarixiy yodgorliklari bilan tanishdilar. Samarqand asrlar davomida g‘oyalar, savdo va innovatsiyalar chorrahasi bo‘lib kelganini ta’kidlashdi.
AQSh tomonining fikricha, Gor va Landau tog‘-kon sanoati va geologiya vaziri Bobir Islomov hamda investitsiyalar, sanoat va savdo vaziri Laziz Kudratov bilan savdo va investitsiyalarni kengaytirish masalasida “samarali muzokaralar” o‘tkazgan.
AQSh tomoni O‘zbekiston hukumatiga mehmondo‘stlik uchun minnatdorchilik bildirdi. Tashrif AQSh va O‘zbekiston o‘rtasidagi do‘stlik hamda strategik hamkorlikning mustahkamlanib borayotganini aks ettiradi.
Ba’zi xabarlarga ko‘ra, tashrif AQSh Prezidenti Donald Trampning Mirziyoyev va Markaziy Osiyo davlatlari rahbarlarini 6-noyabr kuni Vashingtonda o‘tkaziladigan “C5+1” sammitida ishtirok etishga taklif qilgani bilan bog‘liq. “C5+1” formatidagi ilk prezidentlar sammiti 2023-yil sentyabr oyida Nyu-Yorkda bo‘lib o‘tgan edi.
Vashingtondagi ehtimoliy uchrashuv yuzasidan O‘zbekiston prezidenti matbuot xizmati shunday yozdi: «Bo‘lajak tadbirlar rejasi, shu jumladan kelgusi hafta Vashington shahrida “C5+1” formatidagi sammitni o‘tkazish masalalari ko‘rib chiqildi.»
Yangilandi: Shavkat Mirziyoyevning Vashingtonga bo‘lajak tashrifi haqidagi ma’lumot qo‘shildi.