Fransiyada o‘zbekistonlik bankir Kaxramonjon Olimovning o‘g‘irlab ketilishi bo‘yicha tergov olib borilmoqda. Olimov deyarli ikki kun asirlikda bo‘lgan.
Le Monde nashrining yozishicha, ushbu jinoyatda gumon qilingan shaxs allaqachon hibsga olingan.
48 yoshli milliarder va Anorbank’ning 99,38 foiz ulushiga ega yagona egasi Kaxramonjon Olimov 23 iyun kuni Parij markazida o‘g‘irlab ketilgan. Le Monde ma’lumotiga ko‘ra, u Fransiya poytaxtining 8-okrugida ushlab ketilib, Nissa yaqinidagi villaning yerto‘lasiga olib o‘tilgan.
Nashr yozishicha, Olimovga nisbatan zo‘ravonlik ishlatilgan, tahdid qilingan, hatto bo‘ynini kesish sahnasini sahnalashtirishgan. Faqat to‘lov qilingach, u ozod qilingan – jinoyatchilar 10 million dollar talab qilishgan, biroq Le Monde ma’lumotiga ko‘ra, Toshkentdagi vositachiga faqat 200 ming dollar avans to‘langan. Parijdagi Hôtel-Dieu shifoxonasida shifokorlar ko‘plab ko‘karishlar va tan jarohatlarini qayd etishgan. Olimov uyqusizlik, vahimali uyg‘onishlar va doimiy xavotir holati haqida shikoyat qilgan.
“Bu yoqimsiz voqea bo‘ldi, lekin, xayriyatki, ortda qoldi,” — dedi Olimovning shaxsiy kotibi Le Monde bilan suhbatda.
Tanishuvdagi shubhali holat — mehmonxona baridagi “Anastasiya”
Le Monde’ga ko‘ra, Olimov bedarak yo‘qolishidan bir kun oldin Parijdagi Sofitel Arc-de-Triomphe mehmonxonasi barida o‘zini “Anastasiya” deb tanishtirgan ayol unga murojaat qilgan. U o‘zini Turkiyadagi go‘zallik salonida ishlaydigan ayol sifatida tanishtirgan, rus va ingliz tillarida gaplashgan. Biroq bankir ayolning tashqi ko‘rinishi — oq Louis Vuitton kurtkasi, Tiffany bilaguzugi — uning aytgan ishiga mos kelmasligini payqagan.
Olimov Toshkentdan (Istanbul orqali) Parijga uchganidan ikki kun o‘tib g‘oyib bo‘ladi. Uni faqat 48 soatdan keyin, to‘lov amalga oshirilgach, ozod qiladilar.
Moliya fonida — xalqaro loyihalar
Olimov Anorbank’ni boshqaradi — bu 2020 yilda tashkil etilgan raqamli bank bo‘lib, aktivlari 1 milliard dollardan oshadi. Unga ko‘ra, bu O‘zbekistondagi yetakchi banklardan biri. Shuningdek, u Niderlandiyada ro‘yxatdan o‘tgan kompaniya orqali Sirdaryo viloyatida EDF bilan hamkorlikda gaz turbinali elektr stansiyasi qurilishi loyihasida ishtirok etmoqda.
Parijga u ko‘chmas mulk olish bo‘yicha bitimni rasmiylashtirish va EDF bilan uchrashuvlar o‘tkazish uchun borgan. Mehmonxonada to‘qqiz kecha bron qilingan edi, ammo safar o‘g‘irlik bilan yakunlandi.
Le Monde ma’lumotiga ko‘ra, Fransiyada bir gumonlanuvchi “jamoaviy o‘g‘irlash”da ayblanib hibsga olingan.