Mirziyoyeva va Rubio Jekson–Venik tuzatishini bekor qilish tarafdori, ammo qaror AQSh Kongressiga bogʻliq

By | 20/10/2026
Samarqandda Saida Mirziyoyeva va Marko Rubio. Foto Saida Mirziyoyevaning Telegram kanalidan olingan

Oʻzbekiston Prezidenti Administratsiyasi rahbari Saida Mirziyoyeva va AQSh Davlat kotibi Marko Rubio 19-oktabr kuni Samarqandda Jekson–Venik tuzatishini bekor qilish tarafdori ekanini bildirdi. Ushbu tuzatish AQShning Oʻzbekiston bilan savdo munosabatlariga hamon taʼsir koʻrsatmoqda. Rubioning aytishicha, AQSh maʼmuriyati tuzatishni bekor qilishni qoʻllab-quvvatlaydi, biroq qarorni Kongress qabul qilishi kerak.

«Kongressdan soʻrashingiz kerak. Biz uni bekor qilish tarafdorimiz. Kongressda ham uni bekor qilish tarafdori boʻlgan bir qator nufuzli shaxslar bor. Senatda nomzodimni tasdiqlash boʻyicha tinglovlar chogʻida ham mendan bu haqda soʻrashgan va men tuzatishni bekor qilish tarafdori ekanimni aytganman. Maʼmuriyat ham buni amalga oshirishni soʻragan. Kongress hozircha bu masalani koʻrib chiqishga ulgurmagan, ammo umid qilamizki, bu amalga oshadi», — dedi Rubio jurnalistning tuzatish nega hanuz bekor qilinmagani haqidagi savoliga javoban.

Amerika–Oʻzbekiston ishbilarmonlik va investitsiyalar kengashi yigʻilishida soʻzga chiqqan Mirziyoyeva ham tuzatishni bekor qilishni qoʻllab-quvvatladi.

«Janob Davlat kotibi, siz Jekson–Venik tuzatishini Sovuq urush davridan qolgan meros deb atadingiz. Biz ham bunga qoʻshilamiz va uning bekor qilinishidan mamnun boʻlardik» (ingliz tilidan tarjima), — dedi u.

Jekson–Venik tuzatishi AQShda 1974-yilda, Sovuq urush davrida qabul qilingan. U bozor iqtisodiyotiga ega boʻlmagan mamlakatlarga nisbatan odatiy savdo munosabatlari maqomini berishni emigratsiya erkinligiga oid shartlarga rioya etilishi bilan bogʻlagan. Dastlab, tuzatish, avvalo, Sovet Ittifoqida mamlakatdan chiqib ketishga qoʻyilgan cheklovlarga qarshi qaratilgan edi.

Sovet Ittifoqi parchalangach, tuzatish sobiq sovet respublikalarining ayrimlariga, jumladan, Oʻzbekistonga nisbatan ham amal qilishda davom etdi. U AQSh bilan savdoni toʻliq taqiqlamaydi, biroq doimiy va shartsiz odatiy savdo maqomi oʻrniga alohida huquqiy tartibni nazarda tutadi.

Tuzatishning Oʻzbekistonga nisbatan qoʻllanilishini bekor qilish ushbu qonunchilik cheklovini bartaraf etib, ikki tomonlama savdo munosabatlarini rivojlantirishni yengillashtirishi mumkin. Samarqandda tomonlar iqtisodiy hamkorlikni kengaytirish va Amerika kompaniyalari bilan ishlash masalalarini muhokama qildi.

Tuzatishni bekor qilish boʻyicha hozircha aniq muddat eʼlon qilinmagan. Rubio AQSh maʼmuriyatining pozitsiyasini tasdiqladi, biroq Kongress bu masalada hali oldinga siljimaganini taʼkidladi. U tuzatishni bekor qilish boʻyicha kelishilgan qaror yoki ovoz berish sanasini eʼlon qilmadi.

Foto: Samarqandda Saida Mirziyoyeva va Marko Rubio. Foto Saida Mirziyoyevaning Telegram kanalidan olingan.

Yep.uzʼda yana oʻqing:

Yep.uzʼni Googleʼning afzal ko‘rilgan manbalariga qo‘shing

Googleʼda Yep.uz saytini afzal ko‘rilgan manba sifatida qo‘shing, shunda sayt materiallarini «Asosiy yangiliklar» bo‘limida tez-tez ko‘rishingiz mumkin.

Ulaşiş

Fikr bildirish